– tek historia inn i framtida

Etter at slippinga hos Halleraker på Bømlo var ferdig den 18de oktober, gjekk Atløy rett til Hardanger Fartøyvernsenter (HFS) i Norheimsund. Her skal salongen framme byggast opp att ved hjelp av midlar frå Riksantikvaren.

Arbeidet er allereie godt i gang, og dørken er no på det næraste på plass. På grunn av ein del rust under kappa framme på babord side vil ein gjeng reise nedover ein av dei første helgene. Sementen som dannar dørk i skapet skal vekk, og det dårlige stålet skiftast. På denne måten unngår vi å kle inn dårleg stål, noko vi ikkje ynskjer. Vi vil også dekke til brua for å spare arbeid med skraping av teak til våren.

Tilsette på Hardanger Fartøyvernsenter

Arbeidet er planlagt ferdig til 16de desember, men det har ofte vist seg at det tar lenger tid enn planlagt. Forhåpentligvis vil dei 450.000,- som er løyvde frå Riksantikvaren være nok til det planlagde arbeidet. I prisen ligg ikkje skifting av benkar til skinn, men dette lyt vi prøve å få finansiert i neste omgang. Om alt går etter planen vil Atløy være heime til jul, men det er vel sannsynlig at det dryger ut i januar.

Atløys Venner skipa 21/10/00 til dans. Her kom ca 250 personar, og stemninga var høg utover kvelden, med mange danseglade og saftige historier. Toppen nådde Fridtjof Urdal kva historier angår. Denne vil verte lagt ut her, men egnar seg ikkje for sarte sjeler. Også då Steinar Bastesen song opp til dans stod stemninga i taket.

I SKINNVEST: Steinar Bastensen syng Rosa på ball saman med Lundes trio. – Dette er som å vere heime, sa kvalfangaren i skinnvest.

Alt i alt vart dette eit velluka arrangement, med eit overskot på ca 20.000. Pengane vil bli brukte til å betale regning frå Halleraker. 5.000,- vil verte sett på sparekonto til ein framtidig landbase.

Andelslaget Atløy, som eig båten, har no avhelde Årsmøtet. Dessverre var oppmøtet labert. Regnskap, årsmelding og budsjett vart gjennomgått med små merknader. Deretter hadde Trond Strømgren ein gjennomgang av sitt arbeid med dokumentasjon. Så snart han er ferdig med rapporten nærmare jul, vil styret ta ein diskusjon på kva årsmodell Atløy skal settast tilbake til. Pr i dag er dette sett til 74 modell, men det kan være teneleg å sette eit tidlegare årstal.

Med -74 modell vil ein måtte bytte skorstein ”tilbake” til ny, lav type. Samstundes må salongen framme byggast opp med 3 små lugarar, noko som ikkje er tenleg til den farten vi går i. Styret får mandat til å ta ei beslutning på dette.

Etter dette informerte Vigleik om arbeidet på Halleraker og Hardanger. Til slutt informerte Atløys Venner om planane for neste sesong.

Atløy har dei siste to vekene vært på Halleraker Mekaniske Verkstad i Melandsvågen på Bømlo for å skifte ein del stål i fôrskipet og legge på eit par doblingar akter. Under kontroll i fjor synte det seg at mykje stål rundt ventilar var dårleg. Dette vart skifta før sesongen utan at ventilane vart sett i att. Desse vart skifta før avreise til Halleraker.  Når vi først skulle på land på denne verkstaden skulle vi også ta akseltrekk.

Under dette arbeidet synte det seg at vi laut skifte to rullelager og ein pakkboks. Arbeidet går seint då akslingen er montert vanskelig. Vi vil derfor verte nesten 2 veker for sein ut frå slipp i forhold til det som var planlagt. Dette kostar sjølvsagt meir pengar enn forventa, og vi arbeider no for å løyse også dette problemet.

Vi i Atløys Venner inviterer alle båtglade til ”Atløydans” 21.oktober.00 klokka 20.00 på Flora Samfunnshus. Lundes Trio og ei anna overrasking vil syte for dansemusikken. I tillegg vil Fridtjof Urdal halde maritimt kåseri. Arrangementet vil verte halde saman av Jon Birger Ystebø frå Redningsselskapet.

Seint i kveld vart det også bekrefeta at Steinar Bastesen vil stille opp og fortelje ramsalte historier og synge bl.a. Rosa på ball og Kvalfangarvise. Av andre spesielt inviterte nemner vi Tore Hillersøy, Florø Båtforening, Eikefjord Småbåtlag, Stavang Småbåtlag, Anders Haave, Florø Kystkulturlag, Tom Jacobsen, Batalden Robåtlag, M/K Stabben, Frode Rogne, Malvin Toft, Over Stokkk og Stein, Florø Seilforening, Veikinggeneral Vidar Nupen, Svanhilds Venner, Johannes Kleppevik, Norvald Tveit, HJS og sjølvsagt Atløys Venner.

Vi ventar ein stor maritim kveld, med gode historier, dans og kvalbiff frå Bistro To Kokker.

Sesongen går mot hell.
Vi er no ferdig med sesongen 2000, og kan sjå tilbake på eit fantastisk godt år. Etter mykje arbeid i vårens for å få båten ferdig til sesongen, har vi hatt mykje kjøring. Faktisk har vi ikkje kjørt inn så mykje pengar før (i Atløys Venner si historie). Mykje skuldast at vi tidleg bestemte oss for å køyre 14 dagar i Bergen. Dette planlegg vi også til neste år. Der er marknaden større, og prisane høgare. Vi har også hatt eit godt samarbeid med Kulturby Bergen 2000, som ga 150.000,- i kassen. Høgdepunktet var nok for dei flest Nordsteam, eit stemne som samla mange båtar av Atløy sitt kaliber. Vi vart klappa inn Vågen, og både Bryggesiden, og Nordnes var svart i folk. Nokon og ein kvar greip til tårene då. Etter 3 dagar med kaier svarte av folk og stor festivitas, vart stemne avslutta med middag i Håkonshallen for alle mannskap. Utover vanlige blåturar hadde vi også ei samla oljenæring (frå Florø) om bord nokre dagar under ONS, den store oljemessa i Stavanger. Her hadde Bistro 2 Kokkar ansvaret for maten, Viktoria Hotell drikken, så det skorta ikkje på noko. I september var vi innleidd av Posten for å delta på markeringa av Utær Fyr si 100 års markering. Elles var vi som vanleg på Dalsfjordveka, og hadde med folk frå Florø, Askvoll, Holmedal og Straumsnes.

Atløy på slipp.
Atløy ligg no på Halleraker Mekaniske i Melandsvågen for å skifte ein del stål i forskipet. Jobben har tatt 2,5 uke lengre tid enn planlagt, då vi også tar akseltrekk med det same vi er på land. Dette vert noko dyrare enn planlagt (ca. 120.000,-) mellom anna fordi ein del pakkboksar og rullelager på akslingen må skiftast. Vi reknar likevel med å komme oss over denne ”vesle” kneika. I forhold til i fjor vert det som ei pølse i slaktetida. Etter dette verkstadopphaldet fortseter Atløy til Hardanger Fartøyvernsenter for oppattbygging av 2de plass salong framme. Her har Riksantikvaren løyvd 450.000,-, samt 50.000,- for å dokumentere Atløy si historie teknisk slik at alt vert riktig utført. Dette arbeidet vert gjort av Trond Strømgren, ny fartøyvernkonsulet på Kystmuseet. Utover dette laut vi skifte både hjelpemaskin og generator tidleg i sesongen. Etter god innsats frå Sabben i Bergen og NBN Elektro klarte vi å få denne ferdig montert til ca 75.000,-. Vidare er det montert autopilot til 35.000,-

Nyheitsbrev på E-post?
Nyhende vert no fortløpande lagt inn på heimesidene våre. Desse finn du på www.atloy.no. Vil du ta del i nyheitsbrevet som kjem oftare ut enn dette skrivet, sender du adressa di til . Då vil vi sende nyhenda så fort dei kjem. Vi minner også om Andelslaget Atløy (eigarane av båten) sitt årsmøte 24/10/00 klokka 1800 på Kystmuseet. Vennane sitt Årsmøte vil bli på vårparten.

Atløydansen
Laurdag 21.10 vil det verte stordans i Flora Samfunnshus i regi av Atløys Venner. Her vil bli servert kvalgryte, og Lundes Trio speler opp til dans og Fridtjof Urdal halde kåseri. Kveldens hovudgjest er Steinar Bastesen. Alle båtfolk, og andre som er opptatt av kystkultur er spesielt velkommen denne kvelden, og vi håpar på ein riktig maritim hyggekveld. Det er viktig at de skryter av festen så dyk får med folk.

Medlemsmøte på Firda Billag 17.09.00 kl. 19:00 :
Vi har ein del planlegging å gjære framover, og eg kallar derfor inn til møte: Tysdag 17.09.00 kl: 19:00 på Firda Billag.  På dette møtet må vi nesten seie det er møteplikt, då vi blant anna må planlegge dansen og det vidare arbeidet utover hausten.  Om det er mogeleg skal vi ta eit par turar til Hardanger.  Sjekk derfor på på førehand kva helg som er ledige. Vaktliste på dansen må settast opp.

Rekneskapen for årets er i ferd med å ta form, og vi har køyrt inn ca 300.000,- I tillegg til dette kjem 150.000,- frå Kulturby Bergen i samband med køyring på forskjellige arrangement. Dette vert såleis den beste sesongen på lange tider. 

Totalt er det lagt ned bortimot 7.000 timar dugnad så langt, og noko meir vil det bli sjølv om skuta no vil være på Bømlo og i Hardanger fram til midten av desember. 

Sjølv om sesongen har vore svært bra, har vi hatt store utgifter, bl.a. med skifting av hjelpemotor og generator. Det er også montert ny autopilot. Verkstadopphaldet no vert også dyrare enn berekna, slik at vi no er rimelig skrapa i kassa. Mest sannsynleg må vi ta eit lite lån for å komme oss gjennom vinteren, men vi arbeider med diverse inntektsbringande arbeid for å få det heile i hamn.

Allereie no er vi begynt å planlegge neste sesong. Det som allereie er klart er at vi vil ta 14 dagar i Bergen i byrjinga av juni. For mai er det allereie booka turar, og det er best å booke tidlig for å være sikker.

Tilliks med Granvin er Atløy neste år 70 år, noko som skal feirast og markerast for alt det er verdt. Vi planlegg derfor ein fellestur frå Bergen ca 7 juli, til Skjærjehavn, Florø, Silda og Forbundet Kysten sitt landstemne i Bud 12te til 15de juli. Etter dette vil vi returnere via Ålesund for å ta i mot Cutty Sark Tall Ships Race. Denne turen vil være open for alle, så her er det berre å fjølge med. Det er mulig det vert lagt opp til konvoi med fleire deltakande båtar bl.a. Stabben og den nye «Nupegavlen». Forbundet Kysten er også førespurt, og det kan hende dette vert ein kjempehit.

Vi har hatt ein lang og god sesong, og for å gjere litt stas på oss sjølve takka vi ja til invitasjonen frå Granvin om å delta på sesongavslutning på Skjærjehamn. Skjærjehamn var for nokre tiår sidan faktisk FSF sin travlaste ekspedisjon etter Bergen, og båtar nordfrå og sørfrå møttest her for utveksling av gods og passasjerar. Dette er derfor ein naturlig plass å møtest.

 Sjølve Skjærjehamn er ein fantastisk godt bevart stad, og det følast som om tida har stått stille sidan 50 åra. Staden er i dag egd av 2 enker frå Bergen (?) og det ser ut til at dei klarar vedlikehaldet framifrå. Forutan det gamle hotellet finnest her postkontor (sjølvsagt nedlagt), butikk, slipp og ei stor bu. Tidleg på 1900 talet fanst her og ein motorfabrikk.

 Etter planen møtte vi Granvin fredagskvelden og gjekk saman til kai og la oss side ved side. Totalt hadde Atløy ca 25 påmelde, men vi vart tilslutt 12. Granvin var fleir og det vart ein lystig gjeng. Laurdag gjekk vi saman til Eivindvik i strålande vær. Etter nokre timar her returnerte vi for krabbekoking og forberedning til det store krabbebordet. Granvin heldt krabber, og vi fekk ferske reker levert med Sjøgutt heilt frå Måløy !!! På ettermiddagen kom M/K Arnefjord frå Vik. Dette er ein gamal lensmans/skyss/reisande båt som er i privat eige. Festen var bra, så søndagen vart deretter.

Vi håpar at dette vert ein tradisjon, og at vi ser D/S Oster i Skjærjehamn innan eit par år. Deretter kjem vel D/S Stord, og vonleg også D/S Stavenes med tida.

Utvær Fyr er i år 100 år, og dette vart markert på Utvær i går med over 300 frammøtte. Posten har eigne frimerke frå Utvær og nytta høvet til å delta i markeringa.

Atløy gjekk saman med Redningsskøyta i tet i konvoien frå Kolgrov til Utvær der markering og enkel servering føregjekk seg. Været var ikkje av det beste, og ein del av passasjerane merka godt at Atløy kan være noko rank. Alt i alt var det allikevel ein svært fin tur, sjølv om det vart seine kvelden på mannskapet.