– tek historia inn i framtida

Sidan siste informasjon har svært mykje skjedd. Vi hadde som planlagt stordugnad den 12te september, og fekk tømt båten for laust utstyr og ein del boss. Utgangspunktet var då at båten skulle til Hardanger før jul. Etter dette er kontrakten kome på plass, og båten er allereie levert til verftet i Hardanger. 

Dei tre vekene etter den 12te september vart derfor svært hektiske, med dugnad nesten kvar dag. Jobben vart gjort og 2de plass salong vart reven (tak og øvre del av skott). Skipskontrollen har også vært ombord for godkjenning. Stålet ser bra ut, men det står framleis att å få godkjent tanktoppar og kjettingkasse. Vidare vil ein gå over skroget for å måle tjukna, særleg der det tidlegare er dobla med sveiste plater. Dette vil først verte gjort når heile salongen er borte, dvs etter at det nye dekket er lagt.

 5te september gjekk båten til Norheimsund, og påfølgjande helg var 10 mann i Hardanger for dugnad. Presenning vart bygt og delar av det gamle dekket vart reve. Veka etter var Kjartan Tverranger, Torbjørn Aslaksen og Langøy igjen og reiv resten av dekket. Desse tre gjorde ein fantastisk jobb dei verkeleg fortener ros for. Stålet vart også prima, og teikningar av det som må skiftast av stål vart laga. Skjering av dette er allereie i gang, og det vert truleg sett på plass allereie neste helg, då eit nytt lag reiser til Norheimsund. Arbeidet med det nye dekket er allereie i gang, og skal etter planen være sluttført innan midten av januar.

 Ein stor jobb er gjort, men vi må nok forvente oss på mykje meir arbeid når båten er tilbake. Resten av salongen skal rivast, alt stål skal godkjennast og  manglar rettast opp. Kva dette vil innebere har vi enno ikkje oversikt over, det vil først bli klart etter rivinga. Til slutt skal salongen bygjast opp att slik den var. Korvidt vi kan regne med å klare alt dette på dugnad er usikkert. Pr i dag vil det muligens bli for stor belastning på dei få svært aktive, og vi må derfor utvide ”stammen” av aktive. Det som er heilt sikkert er at dette vil koste mykje pengar, både til materialer og arbeid vi lyt sette vekk. Vi tek derfor sikte på ein økonomisk dugnad for å skaffe 200.000,-, som synest nødvendig. Korleis dette skal skaffast er enno i det blå, men ei arbeidsgruppe på 3 personar (underteikna, Trond Økland og Stein Malkenes) startar arbeidet no. Dersom nokon har idear er vi svært takknemleg for innspel.

Hausten er her, og vi har hatt nokre turar i det siste, men særleg mykje pengar i kassen vert det ikkje. Skulekontoret er kontakta, og vi håper at vi kan få til eit samarbeid, der vi ikkje berre brukar Atløy som framkomstmiddel, men også som formidlar av lokalhistorie og kystkultur, f.eks. ved at tidlegare mannskap blir med og fortel om farten. Nest siste helga i august var det Suletur, med godt og vell 20 passasjerer med. Dei hadde ein kjempetur, og det var synd at ikkje fleire hadde høve til å være med. Vidare utover hausten er det ikkje planlagt fleire fellesturar, vi får nok med å få båten klar til den skal til Hardanger Fartøyvernsenter.

Første økt vert laurdag 12 september. Vi går då til henga i Ausa for å tømme lasterommet og legge på land så mykje som mogeleg av det som finnast på 2.plass salong. Heile salongen skal rivast, og mykje ønskjer vi å ta vare på, f.eks. dører, puter, madrassar o.s.v. Vi håper så mange som mulig har høve til å stille. Vi har avgang kl 0900 frå Maritim Hotell, og vil være ferdig til middagstid, alt etter kor mange som stiller. Etter turen vert båten lagt på Kolkaia, slik at vi kjem i gang med samlingane måndag kl 17.00. Alle er selvfølgelig velkommen her, enten for ein kopp kaffi, eller for å ta del i arbeidet. Den første tida bør vi vel også satse på samlingar torsdagane, – det er mykje som skal gjerast.

 Vi har hatt eit styremøte i august, og forutan planlegging av riving vart vi einige om at Leyland hjelpemotor må ut for fullstendig renovering. Ludvik Sandvik vil være ansvarleg for dette. Rivinga av salongen vil Kjartan Tverranger være ansvarleg for, og alle arbeid bør klarerast med han, slik at vi slepp misforståingar. Om mogeleg vil vi også ta av ankerspillet for renovering. Økonomien vil verte kritisk utover vinteren. P.g.a. ein svært dårleg sommar er vi pr i dag i null, dvs at vi ikkje har pengar til  det arbeidet som skal utførast i vinter. Riksantikvaren har løyva pengar til legging av nytt fordekk, men dette vil kun dekke materialer og legging av dekket ; resten må vi sørgje for sjølve. Eit alternativ er å vente til vi har pengar før vi set i gang med arbeidet, men vi vil då miste neste sesong. Vi er derfor einige om å sette i gang, og samtidig sette i gang eit arbeid for å få tak i sponsormidlar. Med den økonomiske situasjonen landet er i no er det ikkje sikkert det vil bli enkelt, men det kan vel endre seg etter budsjetthandsaminga ( ? ?).

 Nytt lager / verkstad vert det fortsett arbeidd med, og eitt alternativ det no vert sett på er kommunen sine skur på Kringleskjæret ( ved miljøhuset) evt i kombinasjon med brakker for verkstad. Arbeidet med Hellesenbua fortset. Til slutt ber eg om at så mange som mogeleg prøver å finne litt tid til dugnad ombord dei komande månadene, vi må rekne med å sende båten til Hardanger før jul.

Ja, så er endeleg sesongen i gang, og skuta skin som aldri før. Det meste er gjort, men sjølv om Idar meiner vi er for flittige til å male, står det framleis litt småplukk att. Dei første turane er unnagjort, og bortsett frå litt kluss i kommunikasjon Vestkysten – underteikna og mannskap har alt gått bra. På grunn av ein kjempe dugnadsinnsats klarte vi å verte ferdig til 14de mai, og det var det ikkje mange som trudde når båten kom att i midten av mars.

Når det gjeld den av og til manglande informasjon, vil dette verte løyst ved at det alltid vil ligge ein perm i postlugaren, som alle kan sjå igjennom. I denne vil ein finne informasjon om felles turar, referat frå styremøte og årsmøte, instruksar for sal og oppgjer, instruksar for mannskap, oversikt over utleigde turar, mannskapslister og anna informasjon som kan være av interesse. Merk dykk spesielt mannskapslista, der er framleis mange ledige hol, også for dekksfolk. I tillegg til dette vil eg prøve å få ut ein info som denne ein gong i månaden til alle medlemmer.

Frå årsmøtet nemner eg kort det nye styret ; Sander Ødelien (formann, ikkje på val), Asle Espeseth (ikkje på val), Ludvik Sandvik (ikkje på val), Kjartan Tverranger (ikkje på val), Ludvik Grytten (attval), Stein Malkenes (ny) og Svein Lin Hansen (ny). Det nye styret har allereie konstituert seg, og referat skal finnast ombord. Det har til no vorte sett opp 2 felles turar ; helgetur til Jacob Sande-festivalen i Fjaler og dagstur til Buelandet 28de juni). Vidare er ein samde om å nytte båten til felles tur på St. Hansafta dersom vi ikkje får utleige. Informasjon om dette finnast i infopermen ombord. Hugs påmelding.

Vi minner også om at vi fortset med samlingar ombord kvar mandags kveld. Framover er dette eit fint høve til å arbeide, men også ta ein kaffi, og kanskje vaflar frå Svein når været innbyr til det. Vi må også belage oss på å tømme kanalen for vårt utstyr, men det er mogeleg vi kan få nokre månader ekstra inntil arbeidet med ny landbase er ferdig. For tida held kommunen på med å bearbeide dei noverande eigarane, og det vert spennande å sjå om dette lykkast. Kommunen ser svær positiv på forslaget, og dette vil være viktig ikkje minst når vi skal finansiere eit storprosjekt som dette blir.

 God Sommar ! ! ! !

Det er på tide å ønske godt nytt år, og samtidig sende med ei lita påminning for dei som ikkje har hatt høve til å betale medlemsavgift. Mange har spurt kva det skal være godt for ; det gir jo ingen fordelar. Vi tar kritikken til følgje, og vil frå og med no være flinkare til å sende informasjon, -og lage i stand turar.

1997 var nok eitt godt år for M/S Atløy. Dugnadsaktiviteten var høg, også i fjor kom vi over 3.000 dugnadstimar. Gjengen er stort sett den samme, men vi ønskjer svært gjerne å sjå fleire om bord til dugnad. Vi hadde totalt 36 turar, og gledeleg er det at vi ser fleire og fleire kundar både frå Førde og Måløy som gler seg over turen om bord. Vi hadde i fjor også gleda av å skysse « Kulturminnestafetten 97 » gjennom fylket, noko som både gav klingande mynt i kassen og mykje heider. Mottakinga vi fekk rundt i fylket var eineståande, og viser kor mykje M/S Atløy betyr for folk.

For mange av  oss har dette vært ein stille vinter, då Atløy har vært på verft i Hardanger for å skifte båtdekk og styrehustak. Det nye dekket er i oregon pine, som originalt, og på lag ferdig. Reparasjonen har vorte dyrare en venta, og kassen er no nærast tom, både hos oss og hos Andelslaget som eig båten. Vi har vidare fått tak i ein bytemotor, som vi treng å oppbevare på ein skikkeleg måte, slik at vi kan spare utgifter til nye deler, som ofte er unødvendig. Vi treng derfor all den hjelp vi kan få, og vonar du får tid til å sleppe giroen i kassen. Medlemsavgifta er 100,- for enkeltmedlemmer og 150,- for familiar, men det er ingenting i vegen for å betale meir.

Vi håper å hente båten heim med det første, slik at vi kan få båten ferdig til sesongstart 18. Mai. Vi vil trenge mykje hjelp, og vil møtest som vanleg på måndagskveldar etter at båten er komen. Ta turen innom, der blir både arbeid, kaffi og gode historier.